انا … اصلاً حرام

لما في مجتمع ! اخلاق البنت بلبسها مش بالرباية ...
ولما يعروها !! تبقي المشكلة كانت اصلا قي العباية
وشاب مش لاقي الجواز واخد لمسنا هواية
وكأنه بيلم حقه اللي طار من اجسامنا بالجباية
وكلام ولمس واغتصاب وسكة قرف ملهاش نهاية
ولما اشتكي رخصي يردوا ان دي مجرد بداية
لتأديب سفالتك وانفلاتك واحترافك للغواية
ابقي انا اصلا حرام

ولما بنت مثال شرف, ادب وعفة والتزام
وتبقي عارفة بظرفها ومشيها تجبرك ع الاحترام
ويجي حيوان سايقه جوعه يمد ايده يشدها !!
ولما تشكي تقول ده حقي يقولوا كسر حُقها
وانك اصلا سايبة شعرك وده منك كان الانتقام
واما نتكلم تخنعي وقدامنا ينقرض الكلام
واما يقولوا دي بت ناقصةوبشعرها ونزولها حرام
ابقي انا اصلا حرام

لما جسمي يكون للخلايق في الشوارع مشاع
ولما شيخ يطلع يهرتل !! في الكباسين والبتاع
ولما هايج يمتلكني في مخه وفيا اشتري وباع
ويفتكر بمرض خياله انه واخدني عن رضا واقتناع
مافرقش سني ولا شكلي وكنت له عبد سمع وطاع
وفي الاخر حكموا ناسي اني مذنبة بالاجماع
وان انا اصل المشكلة مش اللي للداء اشاع
ابقي انا اصلا حرام

طب محجبة وفي كل حتة مؤدبة ومتدينة
ماشية في امان ربها بنت في حالها زينا
اترمي في سكتها مدمن,شافها قال يادي الهنا
واستباح جسمها عادي..قال بتاعتنا كلنا
واتكسرت جواها روحها!! المحجبة المتدينة
واللي كسرها ماهايتحاسب وبرضه هايفضل هنا
ولما يجي يفترسني برضه يفضل المشكل … انا
ابقي انا اصلا حرام

لما تتقمع حريتي وبالدراع ياخدوا حقوقي
ولما اطالب باللي رايح في الدرا يتقاللي فوقي
وكل شيخ دينه يوزه يقوم يطلع بنعله فوقي
اصرخ انجدوا باقيا .. واللي فاضل من شروقي
الحقوا شمسي اللي كانت ناوية تصالح شقوقي
وحتي لما يأفلموني ويحوروا في ادبي وذوقي
ويمنوا عليّ بعربية بايظة كأني باشحت ويقولوا سوقي
ابقي انا اصلا حرام

اما اكون كفرانة دايما ومن حياتي اتقرف
اتعب واحاول..برضه المجتمع مش معترف
ومتحرش يلمس …... ايه!فجأة بقينا بنتكسف !!
اشمعنا مشهد تعريتي من التاريخ مايتحذف
واشكال غريبة في الشوارع عمالة علينا بتتحدف
واما اقدم فيه بلاغ عشان للدنيا يظهر ويتعرف
وفي الاخر انا اللي كافرة وعن ادابي بانحرف
ابقي انا اصلا حرام

ومن غلبي قررت انزل و ع الظلم اثور
وابقي ايجابية في بلدي ويكونلي دور
اتبهدلت واتشتمت واخرها يلمسني تور
ايده سايبة وغيره ساعده,خدوني بالدور
ومهما اصوت يتبت ويقوللي برضه مش هاغور
نفسي يفهم ان دي مش جنة واحنا مش الحور
ويجي هو هو في الاخر بالفجر يتهمني زور
ابقي انا اصلا .. حراااام

جعان ياسيدي وتعبان مفيش ليك دوا
قال يعني لما تلمسني كده عطشك ارتوي
ارتحت انت وسبتني بالرخص جسمي اتكوي
يا اخي ملعون ضميرك اللي في الركن انطوي
ملعونة ثمرة رجولتك اللي نسيت تستوي
بس المهم ولا واحد جنب اختك يستجري يقرب
انما اغتصابي عادي و لمسي وان وشي يبان حرام
ابقي انا وكل اللي قولته ده … حرام