انا الكافر بالعاديات …
انا المغرم باللي ولي وفات
انا الطاير في كون العشق
وكرهي … بس للمسافات
انا حالة … انا فكرة
انا امبارح بتاع بكرة
انا لو مُت وسط الحرب …
تروح روحي لناس … ذكري
انا الخالد … انا الفاني
انا اللي الدنيا ناسياني
انا اودع حمام في السرب
وفي كل جريمة انا الجاني
انا اللي في حزنه قام يرقص
انا اللي الفرح حداه … بيخرس
انا قدري معاكس السعد
و طريق احلامه ما بيخلص
انا المذلول و طيفي الحُر
انا الفايدة وبرضه باضُر
فرس عايش بروح ميت
وروحه دايقة في بعده المُر
انا ملايين وشوش حايرة
انا الاضلاع اللي ف الدايرة
انا اراجوز يضحكهم
والبسمة عكس مركبي سايرة
انا التشويش وانا مركز
انا اللي ع الخيبة باتعكز
و اشطر من يقول : هانجح
وفشلي في قلبي متبروز
انا حبر في القلم خلصان
انا سقاي وهاموت عطشان
شمسي تشرق عكسكم بليل
وقمري في عز النهار سهران
شجيع سيما ومدمن خوف
مولود اعمي ولسه باشوف
انا الظل اللي نوره رماه
وبيفضل عالظلام ملهوف
انا الرافض للمسلم بيه
بعلمه تايه والجدع يلاقيه
انا قاصد اموت باضحك
عشان اوصيك تفتكرني ب ايه :)
