عارف جيلنا ده … اعمي و اخرس و اطرش
اعمي عشان شايف كل حاجة
واطرش عشان سمع بدري كل حاجة
واخرس عشان بيقول كل حاجة
جيلنا ده … شاف الموت وشم ريحته من قبل الاوان … لأ واللي زاد وغطي … انه بقي محترف يسمع صوت خطوات الموت لما يكون مقرب عليه او علي القريبين منه …
جيلنا ده شاف الذل بعينه … شافه راجل مشلول عريان مرمي في شارع ضيق في اكتر يوم برد في الشتا وهايموت من الجوع و في اخر الشارع فيه لقمة ناشفة يتيمة وهو بقاله ساعات بيزحف بكل اللي فاضل له من قوة عشان يوصل لها … وعند اخر خطوة قبل وصوله ليها … مات
احنا الجيل اللي اول ما وعي حاول يدور بنفسه ويفهم يعني ايه حق … وطلع كل اللي شافه وعرفه وهم … وفي الاخر طلعت كل حقوقه -اول عن اخر- … هي اللقمة الناشفة اليتيمة اللي في اخر الشارع
احنا الجيل اللي مات ميت مرة وهو عايش
ولما اتمني الموت … عزرائيل عمل نفسه كفيف
احنا اللي عايشين بس لأنه مفيش اختيار تاني
احنا الجيل اللي مش بيحسد إلا اللي مات
احنا الجيل اللي عايش عشان يريح دماغه من كلام الناس وقرفهم … بياكل ويشرب ويخرج ويدخل ويذاكر ويتخرج ويتجوز ويخلف بس عشان يريح دماغه …
احنا الجيل اللي اخترع السعادة الكئيبة
والجيل اللي خلي الهروب والسكوت … عقيدة ودين
احنا اللي الهم ساقنا نعمل حاجات كتير كارهينها … ورمانا في سجن الندم بعد كده
احنا اللي شايلين فوق دماغنا ذنوب اللي قبلنا ولما ييجوا اللي بعدنا هايشيلونا طينهم وذنوبهم … واحنا في قبورنا
احنا الجيل اللي بيلاقي متعته في النوم وبس
احنا الجيل اللي كفر بكل القديم والمقدس والمسلم بيه
احنا الجيل اللي يوم ما رفض يعيش في قهر … بدم بارد موتوه
احنا اللي غصب عنا بنسمع توجيهات العواجيز اللي هايموتوا ويسيبونا غرقانين في وحل حكمتهم وتوجيهاتهم منتهية الصلاحية
احنا الجيل اللي لما فكر في بكرة … مات امبارح
احنا الجيل اللي بيغيب من مدرسته وكليته لأنه مات … مش عشان عيان او بيذاكر
احنا الجيل اللي جه اخد بواقي كل حاجة …وماشتكاش
احنا اللي ماحضرناش زمن العز ولا جربناه …
احنا اللي نفسيا اغتصبونا … ومستنيين مننا بعد كده نتقدم وننجح
احنا الجيل اللي احلامنا وامانينا بالعيشة في الماضي بقيت اكتر من تفكيرنا في المستقبل
بس برضه … احنا الجيل اللي مش بيخاف
احنا الناس اللي حتي في موتها مصدقة ان فيه بكرة …
احنا الجيل اللي بيرسم بدمه طريقه وبيهتف في وجعه حرية وبيشوف شعاع الامل حاضن شعاع شمس كل يوم جديد …
ومكملين :)
