طول ما نصك التحتاني … عقلك
وطول ما كفري هو اللي شاغلك
وطول مانا سبب تبرر بيه فشلك
هافضل حرام
طول ما عيشتي العادية … مرة
وطول ما بتسموني في سجني حرة
وطول ما بتغتصبني في اليوم الف مرة
هافضل حرام
وافضل حبلي منك ولذنوبك جوايا شايلة
وفي الغلط -لجنابك- انا الحيطة اللي مايلة
ولو فرض معايا حق -بالغصب- عنه مش قايلة
يبقي هافضل حرام
وطول ما في الجعجعة بتطرطش هرمون ذكورة
اما عز المعمعة … يكت السبع لو حس بخطورة
وبتداري نجاستك … ب عمة بيضا في كل صورة
هافضل انا حرام
وطول مانا طينة في ايديك بتشكلها علي كيفك
وطول ما في عقول الغلابة كل يوم بتبخ زيفك
وطول ما انت كذاب وبرضه متخذ من دينك سيفك
هافضل حرام
طول ما مستخسرين فيَ لقب شهيدة
وطول ما بتقمعوني بس … لأني عنيدة
وطول ما تاء التأنيث علي سمعكم لسه جديدة
هافضل حرام
طول ما حجابي مش لربي بس خوف من الديابة
وطول ما بتضيع شبابي في رحلة كُحل مع الكآبة
وطول ما حقوقي عندك مكتوبة في خانة الدعابة
هافضل حرام
رغم اني الف مرة كل يوم لسة باموت
ورغم اني غصب عنك موجودة في كل البيوت
ورغم ان خلاص مراكبك رفضتها كل الشطوط
بسببك هافضل حرام
وحتي لو كهنوا البلد دي واشتروا بلد جديدة
وحتي لو حبسوا اللي ياما نشروا الافكار المريضة
بسبب تشويهك لدينك عن ربها النفوس بعيدة
وبسببك !! هافضل حرام
اشمعني يعني يا شيخنا ايدك عالطماع شديدة
وتقول طمع الفلوس ده ذنب واحكامك فيه سديدة
اما بقي طمعك في جسمي بتحلله انه فريضة
عشان كده هافضل حرام
طول ما في سلمك ورا حيطانك انا متخبية
اما في حربك -بكيفك- عالجبهة وحدي مرمية
وبرصاص جهادك مقتولة ومدبوحة بسيف الشرعية
هافضل حرام
طول ما بتحرم عليَ اللي ليك اصلا حقوق
طول ما راميني بعيد وبيننا بتوسع شقوق
وطول ما مصر بسببك لابسة كل يوم خازوق
طبيعي افضل حرام
طول ما حرام عليَ الناس تعاملني باحترام
وطول ما قمعي وقهري ابهي صور الالترام
وطول مانا مش قادرة اصرخ وممنوعة من الكلام
هافضل حرام
طول ما فارض التعامل بس بضمير المذكر
وطول مانا بس لمزاجك وممنوع اني افكر
وطول ما بتحصر كل حاجة في انها حرام ومنكر
هافضل حرام
ولحد ما العقل المريض يبطل ينشر اكاذيبه
ولحد ما شيخنا يبطل يدرس لابليس اساليبه
ولحد ما تتطهر بلدنا من تاجر الدين والاعيبه
غصب عني … هافضل حرام
