نحكي حكاية .... ونقول : كان يا مكان
من سنة ..... لأ ... من قرن .... مش فاكر … بس هو من زمان
كان في مخلوق حلو وطيب ... كان يمكن اسمه : إنسان
بيحلي الدنيا ويصبغها بأحلى الألوان .... إن كان حزين أو فرحان
ولما ابتدى يتمرد مرة .... قام ربنا هده بـطوفان
لكن فجأة ..... أو براحة و واحدة واحدة ..... ابتدت فصيلة جديدة تبان
على فكرة !! شبه البني آدمين جدا ... بس الجواب بيبان من العنوان
كان نوع غريب ... عجيب ... مريب .. اتوحدت عنده الالوان
أحمر سايل .. اسود سايد ..... وعن معنى ( الإنسان ) .....غفيان
تشوفه كده تحس إنك متضايق ... لأ تحس إنك قرفان
وتحس إنه أكتر إنسان ظالم .... بالنسبة له ..... هادي وغلبان
مش مهم عنده الا ( الأنا) .... ولعيشته هو و بس الضمان
في يوم فكرت : هو ممكن يا رب … بسببهم .... تبقى على خلقنا ندمان ؟؟
ولا لسة عندك أمل ؟؟ ....وشايف فينا شعاع النور البهتان ؟؟
يا ربي أنا عيني منك في الأرض .. آه بصراحة .. خجلان
يمكن تغييرهم محتاج اعجاز ....مصباح علاء الدين … أو خاتم سليمان
أو يمكن ثورة وهتافات ..واعتصامات سنين في ميدان
بس عارف ؟؟؟ احنا محتاجين لينا قبل الناس … من الغيبوبة صحيان
ونرجع للفورمة المطلوبة .... وترجع رحمتك لينا المكان
مش إنسان مشوه قاسي.. طول عمره من وشك هربان
أو بطريقة الناس – للأسف – أعدم أو مرمي في لومان
نفسي يرجع يحس بغيره ... ويبقى اخوه عليه صعبان
نفسي يخاف يخسر نفسه ….فـا يطلع من دنيته كسبان
نفسي يطيعك ويحبك بجد ... وتكون مخافتك بتجري في الشريان
ومايبقاش برضه .... الصايص المايص ..... اللي يفرح اوي لما تقول له يا مان
صحي معنى الإنسان فينا ..... وشيل كل سلبية وأحزان
أصله من غير الأدمية .... يصبح الإنسان … عايش كما الجثمان
أو بيحير ويدير في الدنيا .... ويعجز بدري قبل الأوان
يا رب !! احمينا .. لا نكون القاسي ...ولا الجاهل … ولا اللي على طول حيران
وخلي سلام يسود في قلوبنا ....وأمان في روحنا يدوب دوبان
" خلصت الحدوتة دية
ولسة أكيد في جايين
يمكن قلمي يكتبهم
وجايز أوي أقلام تانيين
بس ليَّ دعا وسؤال
هاقولهم بس في كلمتين
الدعا : يا رب احمينا مننا
رجعنا ليك خاضعين
رجعنا نخافك.اللي موافق
يقول أمين
والسؤال : محدش يعرف
امتى البني آدمين راجعين ؟؟
No comments:
Post a Comment