الأفعال …

المضارع … يعيش …
ده المفروض !!
لكن الواقع !
انه عالدنيا … مفروض
غصبٍ عنه دخلها
مرفوض
مش بتصالحه
ولا بالعافية
ولا لو قدم
لجلالها فروض
مش متأكد
اذا كان عايش
او كان شئ
معروض
سكة طويلة
شايفها !!
طوييييلة
وبدايتها
طريق مسدود
الامر : عييييش
ساير الدنيا
وكل فيها عيش
خد من الناس
وان طلبوا هم
قول مامعيش
اصلها ليها
مع الغني
كلام
والمحتاج
بتقول له سلام
و اخرهم
انسان واحد
في تراب بينام
بس انت ! تمام
تيجي وتروح
في امان وسلام
و ان راحت الروح
هاتروح لظلام
بس تعالي
وقول بالذمة !!
مش تستاهل !
تتعب حبة كمان
في الاخر
بس تعيش …
ايوه … عييييش
والماضي : عاش
مش متأكد !
عاشها بجد !
ولا راح العمر
بلاش
لما تعاني
بعد الموت
تطلب يوم
وترد الدنيا تقول
ماعهاش
عمرك صورة
و الاخر لو ضلمة
يبقي نسيت
تلاقيلها فلاش
نور بينور !
واما بيظهر
صورة العمر
تقولك : عاااش
يعيش
عيش
عاش
الافعال نادت
م القبر
قالت بعد ما
دقنا المر
واتمرمطنا
وخلص العمر
اوعي تعيش
في الماضي والامر
اوعي تنزل هنا
وزي الكرام
علينا تمر
بروز حياتك كده
وبص من بعيد
تستاهل تتشاف !!
ولا نقول stop
ومن الاول … عيد
ارفع عينك
لأعلي اماني
كون الفرق !!
كون الراحة
لناس بتعاني
اوعي تعيش
والميت هدفك
اوعي يكون
الموت لينا حدفك
بص من الاول
لأخرها
ولو تستاهل !
ياللا عيشها
افهم انه !
من اول ما تجيها
كل ما فيها
بيقول لك
عيييييش
قبل ما مرة
ترد الدنيا :
لقد نفذ رصيدكم
نأسف … مفييييش