انا الفقر …

ماقدرتش …
ارفع عيني …
لما هتكوا عرض بدني
ماقدرتش …
اصرخ وازعق
م اللي بجزمته خانقني
فاضللي ايه …
من دنيا واسعة
اضيق ما فيها …
مكاني

اشكي لمين جرحي واقولله
(سحبوا بسرنجة من عروقي
كرامتي
و بالذل بدالها شربوني
دم العبيد)
كنت انا من يوم ولادتي
اصلا … وحيد
انا اللي كان واللي هايفضل
حيطة الوطن اللي مايلة
انا فئة الشعب اللي بطعم مر
ووجع في قلوبها شايلة
انا الفقير …
اللي من غيره يمكن
كانت الناس عالكرب تصهين
…
انا اللي مش متوفر له عيشه
فا من اول ما يوعي يلقي عيشه
بطعم موت …
انا اللي عشت ميت
ولما مت … صرت عايش
اصلي من اول ما جيتها
كنت عامل حسابي … مش هابيت

تعالي اغتصبني يا بيه
فتح عيني عالحقيقة
اني مجرمة ولو كنت
انا اصلا بريئة
فهمني ان نوعي
تمنه ارخص
فهمني ان اريح
اموت ونخلص
بس قبلها … سيبني افهمك
ان جنس الفقرا يا بيه
اغلي ما يملك … كرامة !!
وان تاجرت وبعت فيه …
هاتضيع الغالي عليه …
ف يكونلك شبحك في نومك
بس ندمك ساعتها !
ينفع ب ايه
و ف ساعتها
يصبح مش همه الحياة
وان حاولت تاني تجور عليه
هايبهدلك
ماتحاولش تلعب مع واحد
تسحله ف هايسحلك
ماتحاولش تلعب مع واحد
ماعندوش اللي يزعل عليه

سيبنا من قذارتك وسياستك
قضيتنا في مدي رجولتك
الشعب ده اصله دكر
والست منه بميت نفر
الشعب ده مش مبرشم
ولا بيفوت حاجات
الشعب ده مش هايرضي
ان يحكمه … بنات